Кешенді жаттығу

«Aqtobe su-energy group» АҚ нысанында кешенді оқу-жаттығу өтті.

29 тамыз күні «Aqtobe su-energy group» АҚ-ның Төменгі Қарғалы су залалсыздандыру аумағында хлордың төгілуі және сорғы ғимаратында өрт шығуы жағдайына арналған оқу-жаттығу ұйымдастырылды. Шараға мекеме апаттық қызметінің мамандары, «Өрт сөндіруші» ЖШС, ТЖД өрт сөндіру қызметі және ҚР ТЖМ Апаттар медицинасы орталығының өкілдері қатысты.

Оқу-жаттығудың басты мақсаты – төтенше жағдай кезіндегі қызметтердің өзара іс-қимылын үйлестіру, әрекет ету алгоритмін жетілдіру, сондай-ақ өрт пен апат салдарын жою бойынша практикалық дағдыларды шыңдау болды. Қатысушылар өртті сөндіру, қауіпті аймақты оқшаулау, зардап шеккендерді эвакуациялау және алғашқы көмек көрсету бойынша жаттығулардан өтті.

Жаттығу барысында жедел штабтың шешім қабылдау қабілеті, ресурстарды басқару деңгейі және барлық қызметтердің үйлесімді әрекеті бағаланды. Мұндай шаралар қызметкерлердің кәсіби даярлығын арттыруға, өндірістік нысандардағы қауіпсіздікті қамтамасыз етуге және төтенше жағдайлардың алдын алуға бағытталған.